ដាយ អុិឈិ ឡាយហ្វ៍ បានប្រកាសសម្ពោធជាផ្លូវការផលិតផល CREDITCare ដែលជាការធ្វើបច្ចុប្បន្នភាពទៅលើដំណោះស្រាយការពារកម្ចីរបស់ខ្លួន ដើម្បីពង្រីកវិសាលភាព និងគុណភាពផលិតផល។ ផលិតផល CREDITCare ត្រូវបានអភិវឌ្ឍជាមួយនឹងមុខងារការពារហិរញវត្ថុកាន់តែទូលំទូលាយជាងមុនសម្រាប់គ្រួសារនៅកម្ពុជា ងាយស្រួលក្នុងការទទួលបាន និងការពារអតិថិជនពីហានិភ័យនៃបញ្ហាហិរញ្ញវត្ថុក្នុងគ្រាជួបទុក្ខលំបាក។
ផលិតផលនេះបង្ហាញពីការបោះជំហានដ៏សំខាន់ របស់ ដាយ អុិឈិ ឡាយហ្វ៍ ក្នុងការលើកកម្ពស់បរិយាបន្នហិរញ្ញវត្ថុ និងពង្រឹងដំណោះស្រាយឱ្យសមស្របទៅនឹងតម្រូវការកើនឡើងនៃទីផ្សារឥណទាននៅកម្ពុជា។
គ្រប់កម្ចីទាំងអស់ សុទ្ធសឹងតែមានរឿងរ៉ាវនៅពីក្រោយ
ខណៈពេលដែលសេដ្ឋកិច្ចកម្ពុជាបន្តរីកចម្រើន កម្ចីក្លាយជាចលករដ៏សំខាន់នៅពីក្រោយការអភិវឌ្ឍនៃគ្រួសារនីមួយៗ។ គិតត្រឹមចុងឆ្នាំ២០២៥ ប្រជាជនកម្ពុជាប្រមាណ៥.១២លាននាក់បានខ្ចីកម្ចី ដែលក្នុងនោះ ប្រមាណ៥១% នៃចំនួនអ្នកខ្ចីសរុបជាមនុស្សពេញវ័យ។
នៅពីក្រោយបំណុលនីមួយៗតែងមានរឿងរ៉ាវផ្សេងៗ និងជាក្តីសុបិន្តណាមួយ តួយ៉ាងអាចជា គូស្វាមីភរិយាសម្រេចចិត្តទិញលំនៅឋានដំបូង ជាម្តាយដែលគិតគូរពង្រីកអាជីវកម្ម ជាឪពុកដែលគិតគូរវិនិយោគលើការសិក្សារបស់កូន និងមានរឿងរ៉ាងជាច្រើនទៀត។ ទាំងនេះសុទ្ធតែជាក្ដីសុបិន្ត ហើយក្តីសុបិន្តនេះរមែងនាំមកនូវក្តីបារម្ភដែលអ្នកខ្ចីតែងចោទសួរខ្លួនឯងថា៖«តើនឹងមានរឿងអ្វីកើតឡើងប្រសិនបើថ្ងៃណាមួយមិនមានវត្តមានរបស់ខ្ញុំ?»
បើមិនមានការការពារកម្ចី ការខិតខំប្រឹងប្រែងរបស់លោកអ្នកកន្លងមកអាចនឹងត្រូវបាត់បង់ក្នុងរយៈពេលមួយប៉ប្រិចភ្នែក។ ហេតុដូចនេះហើយទើបយើងបង្កើត ផលិតផល CREDITCare ឡើងដើម្បីឆ្លើយតបទៅនឹងក្តីបារម្ភរបស់លោកអ្នក។ វាប្រៀបដូចជាការសន្យាមួយ ដែលផ្តល់ក្ដីសង្ឃឹមដល់ក្រុមគ្រួសារជាច្រើននៅកម្ពុជា។
ការប្ដេជ្ញាចិត្តរបស់ ដាយ អ៊ិឈិ ឡាយហ្វ៍ ក្នុងការផ្តល់សុវត្ថិភាពហិរញ្ញវត្ថុជូនអតិថិជន
លោក Mah Kin Yoong អគ្គនាយកប្រតិបត្តិនៃ ដាយ អុិឈិ ឡាយហ្វ៍ បានមានប្រសាសន៍ថា៖ «អតិថិជនរបស់យើងមិនមែនត្រឹមតែជាអ្នកខ្ចីទេ ប៉ុន្តែជាគ្រួសារដែលកំពុងកសាងក្ដីសុបិន្តរបស់ខ្លួនជាមួយនឹងកម្ចីដែលគាត់ប្រើប្រាស់។ ការសម្ពោធផលិតផលនេះឆ្លុះបញ្ចាំងពីគោលបំណងរបស់ក្រុមហ៊ុន ក្នុងការកសាងអនាគតកាន់តែប្រសើរ និងមានសុវត្ថិភាពជូនអតិថិជន ហើយ ផលិតផល CREDITCare នឹងធានាថា ក្ដីសុបិន្តទាំងនោះនឹងត្រូវបានការពារ បើទោះបីជាពួកគាត់ជួបស្ថានភាពលំបាកយ៉ាងណាក៏ដោយ។ នេះជាផលិតផលថ្មីទី៣ហើយដែលយើងដាក់សម្ពោធក្នុងរយៈពេល១ឆ្នាំចុងក្រោយនេះ ហើយយើងនៅតែប្ដេជ្ញាចិត្តបន្តនាំយកដំណោះស្រាយកាន់តែច្នៃប្រឌិតបន្ថែមទៀតមកជូនអតិថិជន។»
អំពីគម្រោង CREDITCare
CREDITCare ផ្ដល់ជូនការការពារកាន់តែទូលំទូលាយ ដែលបង្ហាញពីការបេជ្ញាចិត្តបន្ថែមរបស់ ដាយ អុិឈិ ឡាយហ្វ៍ ក្នុងការផ្តល់សុវត្ថិភាពហិរញ្ញវត្ថុ។ ផលិតផលនេះធានាថាកាតព្វកិច្ចក្នុងការបង់កម្ចីទាំងអស់ត្រូវបានធានារ៉ាប់រងទាំងស្រុង ដើម្បីសម្រាលបន្ទុកហិរញ្ញវត្ថុរបស់អតិថិជន ក្នុងករណីសមាជិកគ្រួសារដែលជាកូនបំណុលទទួលមរណភាព ឬពិការភាពជាអចិន្ត្រៃយ៍។ ផលិតផល CREDITCare ផ្ដល់ជូននូវការការពាររយៈពេលវែង និងភាពស្ងប់ចិត្តកាន់តែប្រសើរដល់ប្រជាជនកម្ពុជា។ អតិថិជនអាចជ្រើសរើសជម្រើសការពារដែលមានភាពបត់បែនសម្រាប់ទំហំឥណទានផ្សេងៗគ្នា ដំណើរការទិញក៏មានភាពងាយស្រួល ឯរយៈពេលនៃការការពារមានរហូតដល់២៥ឆ្នាំ និងការការពាររហូតដល់វ័យ៧០ឆ្នាំ។
ឥឡូវនេះ អតិថិជនអាចស្វែងរកផលិតផល CREDITCare នៅតាមបណ្ដាសាខាធានាគារដៃគូរបស់ ដាយ អុិឈិ ឡាយហ្វ៍ នៅទូទាំងប្រទេសកម្ពុជា រួមមាន ធនាគារវឌ្ឍនៈ ធនាគារ អ អេច ប៊ី ធនាគារ សាខមប៊ែង គ្រឹះស្ថានមីក្រូហិរញ្ញវត្ថុ អេ អឹម ខេ និង ធនាគារ អ៊ូរី។
