ថ្ងៃទី១១ ខែមករា ឆ្នាំ២០២៣ – ក្រុមហ៊ុន ដាយ អុិឈិ ឡាយហ្វ៍ បរិច្ចាគថវិកាចំនួន ១៥០០០ ដុល្លារជូនមន្ទីរពេទ្យកុមារអង្គរដើម្បីគាំទ្រដល់ប្រតិបត្តិការរបស់មន្ទីរពេទ្យក្នុងការផ្តល់ការថែទាំ និងការព្យាបាលប្រកបដោយគុណភាពដល់ទារកក្នុងប្រទេសកម្ពុជា។
ការបរិច្ចាគនេះបានធ្វើឡើងនៅមន្ទីរពេទ្យកុមារអង្គរក្រោមវត្តមាន លោកវេជ្ជបណ្ឌិត ងួន ច័ន្ទភក្ត្រា នាយកមន្ទីរពេទ្យកុមារអង្គរ និងមានការចូលរួមពីលោក Toshiaki Sumino, Director, Managing Executive Officer ដាយ អុិឈិ ឡាយហ្វ៍ ហូលឌីង លោក អាឡិន ថៃ អគ្គនាយកប្រតិបត្តិនៃក្រុមហ៊ុន ដាយ អ៊ិឈិ ឡាយហ្វ៍ និងភ្ញៀវកិត្តិយសជាច្រើនរូបទៀត។
នេះជាការបរិច្ចាគលើកទី២ ដល់មន្ទីរពេទ្យកុមារអង្គរបន្ទាប់ពីការបរិច្ចាគលើកទី១ ដែលបានធ្វើឡើងក្នុងខែធ្នូ ឆ្នាំ២០២២ តាមរយៈយុទ្ធនាការ “ការពារ និងបរិច្ចាគ” របស់ក្រុមហ៊ុន។
លោក អាឡិន ថៃ អគ្គនាយកប្រតិបត្តិនៃក្រុមហ៊ុន ដាយ អ៊ិឈិ ឡាយហ្វ៍ បានមានប្រសាសន៍ថា៖ “យើងបរិច្ចាគជូនមន្ទីរពេទ្យកុមារអង្គរ ពីព្រោះយើងមានទំនួលខុសត្រូវចំពោះសហគមន៍ ហើយដោយសារតែការងាររបស់មន្ទីរពេទ្យគឺស្របនឹងគោលការណ៍ DSR របស់ក្រុមហ៊ុនដែលមានគុណតម្លៃដូចជា “លើកកម្ពស់សុខុមាលភាព” និង “ការរួមចំណែកសង្គម”។
លោក អាឡិន ថៃ បានបន្ថែមថា៖ "យើងសង្ឃឹមថាការរួមចំណែកនេះ នឹងជួយមន្ទីរពេទ្យឱ្យកាន់តែរឹងមាំ ដើម្បីបន្ដលើកកម្ពស់ប្រព័ន្ធថែទាំសុខភាពសម្រាប់ទារកកម្ពុជាជាច្រើនជំនាន់តទៅមុខទៀត"។
លោកវេជ្ជបណ្ឌិត ងួន ច័ន្ទភក្ត្រា បានមានប្រសាសន៍ថា៖ “តំណាងឱ្យមន្ទីរពេទ្យកុមារអង្គរ ខ្ញុំសូមថ្លែងអំណរគុណយ៉ាងជ្រាលជ្រៅចំពោះក្រុមហ៊ុន ដាយ អ៊ិឈិ ឡាយហ្វ៍ សម្រាប់ទង្វើប្រកបដោយមេត្តាធម៌នេះ។ ទឹកប្រាក់នេះ នឹងជួយបេសកកម្មរបស់មន្ទីរពេទ្យក្នុងការផ្ដល់ការថែទាំល្អបំផុតដល់ទារកដើម្បីឱ្យពួកគេមានកុមារភាពមួយដែលសប្បាយរីករាយ និងសុខភាពល្អ និងក្លាយជាមនុស្សធំពេញវ័យដែលរឹងមាំ។”
អំពី ដាយ អុិឈិ ឡាយហ្វ៍
ដាយ អុិឈិ ឡាយហ្វ៍ (“Dai-ichi Life”) គឺជាក្រុមហ៊ុនធានារ៉ាប់រងអាយុជីវិតដែលមានការរីកលូតលាស់លឿនបំផុតមួយនៅក្នុងប្រទេសកម្ពុជាក្នុងរយៈពេលត្រឹមតែជាង ៤ ឆ្នាំប៉ុណ្ណោះ។ ដាយ អ៊ិឈិ ឡាហ្វ៍ ជាក្រុមហ៊ុនបុត្រសម្ព័ន្ធរបស់ក្រុមហ៊ុន Dai-ichi Life Holdings, Inc. (“DLHD”) ដែលជាក្រុមហ៊ុនធានារ៉ាប់រងអាយុជីវិតឈានមុខគេក្នុងប្រទេសជប៉ុនអស់រយៈពេលជិត ១២០ ឆ្នាំ ជាប្រវត្តិសាស្ត្រ។ DLHD ទទួលបានការវាយតម្លៃ A+ ដោយ S&P និងបានចុះបញ្ជីនៅលើទីផ្សារភាគហ៊ុនតូក្យូស្តុកអ៊ិចឆេង (Tokyo Stock Exchange) ។
ចាប់តាំងពីបង្កើតក្រុមហ៊ុន DLHD ក្នុងឆ្នាំ ១៩០២ មក ក្រុមហ៊ុន ដាយ អ៊ិឈិ ឡាយហ្វ៍ បានប្តេជ្ញាចិត្តឈរនៅក្បែរអតិថិជនរបស់យើងជានិច្ច និងមនុស្សជាទីស្រឡាញ់របស់ពួកគេអស់មួយជីវិត និងខិតខំប្រឹងប្រែងរួមគ្នាក្នុងការផ្តល់ជូននូវ “ភាពស្ងប់ចិត្ត” ក្រោមទស្សនៈរបស់យើង “អតិថិជនជាចម្បង”។ ក្រុមហ៊ុនបានរួមចំណែកផ្តល់ជូននូវភាពស្ងប់ចិត្តតាមរយៈការផ្តល់សេវាធានារ៉ាប់រងអាយុជីវិត និងសេវាហិរញ្ញវត្ថុផ្សេងៗដល់សហគមន៍ក្នុងមូលដ្ឋាន។