ថ្ងៃទី០៤ ខែសីហា ឆ្នាំ២០២៣ –  ក្រុមហ៊ុនធានារ៉ាប់រងអាយុជីវិត ដាយ អុិឈិ ឡាយហ្វ៍ (ខេមបូឌា) បានសម្ពោធទីស្នាក់ការកណ្តាលថ្មីរបស់ខ្លួនជាផ្លូវការនៅថ្ងៃនេះ ដើម្បីផ្តល់បទពិសោធន៍ថ្មីដ៏សម្បូរបែបជូនដល់អតិថិជន និងដៃគូសហការនានា ក៏ដូចជាបន្ដពង្រឹងការប្តេជ្ញាចិត្តរយៈពេលវែងរបស់ក្រុមហ៊ុនដែលកំពុងមានការរីកចម្រើនយ៉ាងឆាប់រហ័សមួយនេះទៅដល់ប្រជាជនកម្ពុជា។

ពិធី​សម្ពោធ​ទីស្នាក់ការកណ្តាល​ថ្មី​នេះ ប្រព្រឹត្តទៅក្រោមអធិបតីភាព ឯកឧត្តម ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា លោក ពន្លឺ តុលា ជាអគ្គនាយកប្រតិបត្តិ និងសមាជិកក្រុមប្រឹក្សាភិបាល របស់ក្រុមហ៊ុន ដាយ អុិឈិ ឡាយហ្វ៍។

ឯកឧត្តម ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជាមានប្រសាសន៍ថា៖ “ខ្ញុំសូមអបអរសាទរដល់ ក្រុមហ៊ុន ដាយ អុិឈិ ឡាយហ្វ៍ កម្ពុជា សម្រាប់ការសម្ពោធទីស្នាក់ការកណ្តាលថ្មីនេះ ដែលបានឆ្លុះបញ្ចាំងពីការរីកចម្រើន និងឆន្ទៈរបស់ក្រុមហ៊ុនក្នុងការធ្វើអាជីវកម្មនៅកម្ពុជារយៈពេលយូរអង្វែង។ ទន្ទឹមនឹងនេះ ទីស្នាក់ការកណ្តាលថ្មីនេះ ក៏បានចូលរួមចំណែកជំរុញដល់វិស័យធានារ៉ាប់រងនៅកម្ពុជាឱ្យកាន់តែមានភាពរីកចម្រើនថែមទៀត ជាមួយនឹងសេវាកម្មធានារ៉ាប់រងអាយុជីវិតកាន់តែសម្បូរបែបប្រកបដោយទំនុកចិត្ដជូនដល់ប្រជាពលរដ្ឋកម្ពុជា និងផ្ដល់ភាពងាយស្រួលដល់អតិថិជនក្នុងការទិញផលិតផលធានារ៉ាប់រង។”

លោក ពន្លឺ តុលា​ អគ្គនាយកប្រតិបត្តិ ​ក្រុមហ៊ុន ដាយ អុិឈិ ឡាយហ្វ៍ មានប្រសាសន៍ថា៖ “ការសម្ពោធទីស្នាក់ការកណ្តាលថ្មីនេះ បង្ហាញជាថ្មីម្ដងទៀតថា​យើងមានឆន្ទៈក្នុងការបម្រើប្រជាជន​កម្ពុជាជាច្រើនឆ្នាំតទៅមុខទៀត។ ទីស្នាក់ការកណ្តាលថ្មីរបស់យើង មានភាពធំទូលាយ ទំនើបជាងមុន និងមានលក្ខណៈពិសេសជាច្រើនដើម្បីបំពេញតម្រូវការដែលមានស្រាប់ និងតម្រូវការថ្មីដែលកំពុងកើនឡើង ដោយសារយើងបានឈានដល់ភាពរីកចម្រើនថ្មីមួយកម្រិតទៀត។ ទីតាំងថ្មីនេះអនុញ្ញាតឱ្យយើងផ្តល់សេវាកម្មកាន់តែប្រសើរ សាមញ្ញ និងមានប្រសិទ្ធភាពខ្ពស់ជូនដល់អតិថិជនរបស់យើង និងភាគីពាក់ព័ន្ធទាំងអស់ពីកន្លែងតែមួយ។”

ទីស្នាក់ការកណ្តាលថ្មីដែលមានភាពធំទូលាយ និងផាសុកភាពល្អ ​គឺជានិម្មិតរូបនៃមហិច្ឆតារបស់ក្រុមហ៊ុន ដាយ អុិឈិ ឡាយហ្វ៍ ដើម្បី​ក្លាយ​ជា​ក្រុមហ៊ុន​ធានា​រ៉ាប់រង​អាយុ​ជីវិត​ឈានមុខគេនៅក្នុង​ប្រទេសកម្ពុជា។ ទីស្នាក់ការកណ្តាលថ្មីនេះ មានទីតាំងស្ថិតនៅអគារសាមគ្គីក្នុងតំបន់ពាណិជ្ជកម្មដ៏សំខាន់មួយក្នុងខណ្ឌទួលគោក និងត្រូវបានរចនាឡើងដើម្បីផ្តល់បទពិសោធន៍ ផលិតភាព និងការប្រាស្រ័យទាក់ទងគ្នាល្អបំផុត។

ជាមួយគ្នានេះដែរ ទីស្នាក់ការកណ្តាលថ្មីក្រុមហ៊ុន ដាយ អុិឈិ ឡាយហ្វ៍ ផ្ដល់លក្ខណៈពិសេស និងបំពាក់ជាមួយសំភារៈបរិក្ខារជាច្រើនដែលមានដូចជា កន្លែងចតរថយន្តដែលផ្ដល់ភាពងាយស្រួល កន្លែងរង់ចាំប្រកបដោយផាសុកភាព បន្ទប់ប្រជុំដ៏ធំទូលាយ កន្លែងសម្រាប់ការបណ្ដុះបណ្ដាល និងកន្លែងហាត់ប្រាណផងដែរ។ នៅតាមជញ្ជាំងនៅក្នុងទីស្នាក់ការកណ្តាលថ្មីនេះ ត្រូវបានលម្អទៅដោយគំនូរបង្ហាញវប្បធម៌ខ្មែរ និងជប៉ុនដែលគូរដោយវិចិត្រករខ្មែរ។

អាសយដ្ឋានថ្មី៖ ជាន់ផ្ទាល់ដី ជាន់ទី១ និងជាន់ទី២ អគារសាមគ្គី ផ្លូវលេខ៣១៥ ភូមិ៦ សង្កាត់បឹងកក់២ ខណ្ឌទួលគោក រាជធានីភ្នំពេញ។

ដើម្បីស្វែងយល់បន្ថែមអំពីទីស្នាក់ការកណ្តាលថ្មីរបស់ ក្រុមហ៊ុន ដាយ អុិឈិ ឡាយហ្វ៍ ឬសាកសួរព័ត៌មានអំពីផលិតផល និងសេវាកម្មធានារ៉ាប់រងអាយុជីវិតរបស់យើង សូមចូលទៅកាន់ទំព័រ Facebook៖ facebook.com/DaiichiLife.Cambodia ឬគេហទំព័រ៖ www.dai-ichilife.com.kh។ ​​​

លោកអ្នកក៏អាចទាក់ទងយើង តាមរយៈលេខទូរស័ព្ទ៖ ០២៣ ៩៥៥ ៣៣៣ ឬ ១៨០០ ២០១ ២០២ (ឥតគិតថ្លៃ)។

ក្រុមហ៊ុន ដាយ អុិឈិ ឡាយហ្វ៍ មានការិយាល័យនៅរាជធានីភ្នំពេញ និងសាខានៅខេត្ដបាត់ដំបង និងខេត្តសៀមរាប និងបានកំពុងផ្ដល់សេវាកម្មដល់ជាង ១០,០០០ ក្រុមគ្រួសារ។