រាជធានីភ្នំពេញ នៅថ្ងៃទី២៥ ខែ កក្កដា ឆ្នាំ ២០១៩៖ ក្រុមហ៊ុនធានារ៉ាប់រងអាយុជីវិត ដាយ អុិឈិ ឡាហ្វ៍ អុីនសួរុិនស៍ (ខេមបូឌា) ម.ក បានចូលរួមក្នុង ទិវាធានារ៉ាប់រង ដែលជាព្រឹត្តិការណ៍ប្រវត្តិសាស្ត្រថ្នាក់ជាតិដំបូងបង្អស់ ប្រារព្ធឡើងនៅថ្ងៃទី២៥ ខែកក្កដា ឆ្នាំ២០១៩ នៅសណ្ឋាគារសុខាភ្នំពេញ ដែលរៀបចំឡើងដោយ ក្រសួងសេដ្ឋកិច្ច និងហិរញ្ញវត្ថុ។
ទិវាធានារ៉ាប់រង នេះត្រូវបានផ្តួចផ្តើមនៅក្នុងគោលបំណងសំខាន់មួយ គឺដើម្បីជម្រុញការអភិវឌ្ឍលើវិស័យធានារ៉ាប់រងនៅកម្ពុជា ក៏ដូចជាបង្កើនការយល់ដឹងជាសាធារណៈស្តីអំពីឧស្សាហកម្មធានារ៉ាប់រងនៅកម្ពុជា ឱ្យបានទូលំទូលាយ ។ ទិវានេះផ្តល់នូវឱកាសល្អដល់ក្រុមហ៊ុនធានារ៉ាប់រងដែលមានប្រតិបត្តិការអាជីវកម្មនៅក្នុងប្រទេសកម្ពុជា ធ្វើការណែនាំអំពីក្រុមហ៊ុន និងផលិតផលរបស់ពួកគេជូនដល់សាធារណជនផងដែរ។
ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍នៅក្នុងសិក្ខាសាលាស្តីពីទិវាធានារ៉ាប់រង នេះថា "គោលបំណងនៃការប្រារព្ធទិវាធានារ៉ាប់រងនៅថ្ងៃនេះគឺ ទីមួយ៖ ជាការរម្លឹកថ្ងៃចាប់បដិសន្ធិនៃច្បាប់ស្តីពីការធានារ៉ាប់រង; ទីពីរ៖ ជាការបង្ហាញពីការគាំទ្ររបស់រាជរដ្ឋាភិបាល ក្នុងការជម្រុញឲ្យមានពិពិធកម្មផលិតផលហិរញ្ញវត្ថុនៅក្នុងវិស័យហិរញ្ញវត្ថុ ដូចមានចែងក្នុង យុទ្ធសាស្រ្តចតុកោណ របស់រាជរដ្ឋាភិបាល និងទីបី៖ ជាការបង្ហាញដល់សាធារណជនជ្រាបថា ការធានារ៉ាប់រងគឺជាផ្នែកមួយនៅក្នុងវិស័យហិរញ្ញវត្ថុ ដែលមានតួនាទីយ៉ាងសំខាន់ និងចាំបាច់ក្នុងការចូលរួមចំណែកកសាងសំណាញ់សុវត្ថិភាពសង្គម និងសេដ្ឋកិច្ចជាតិ" ។