ដាយ អុិឈិ ឡាយហ្វ៍ បានរៀបចំកម្មវិធីថ្លែងអំណរគុណអតិថិជននៅក្នុងខេត្តសៀមរាប ដោយនាំមកជូននូវវេទិកាសុខភាព និងកម្មវិធីផ្តល់អត្ថប្រយោជន៍ពិសេសសម្រាប់អតិថិជន ដែលផ្តល់ជូនអតិថិជនលើសពីការការពារហិរញ្ញវត្ថុ។

កម្មវិធីនេះឆ្លុះបញ្ចាំងអំពីសេវាកម្មបែប Omotenashi ​ ដែលជាទស្សនៈមួយបំផុសគំនិតដោយជនជាតិជប៉ុន។ ដាយ អុិឈិ ឡាយហ្វ៍ តែងគិតគូរយកចិត្តទុកដាក់ចំពោះអតិថិជន បំពេញតម្រូវការអតិថិជនសម្រាប់ការរស់នៅប្រចាំថ្ងៃ និងផ្តល់ការការពារនៅគ្រប់ដំណាក់កាលនៃជីវិត។

ជាផ្នែកមួយនៃកម្មវិធីថ្លែងអំណរគុណនេះ ដាយ អុិឈិ ឡាយហ្វ៍ បានរៀបចំវេទិកាសុខភាពដែលមានវត្តមានវេជ្ជបណ្ឌិតជំនាញមកពីមន្ទីរពេទ្យកុមារអង្គរ និងមន្ទីរពេទ្យនាគទេព។ វេទិកាសុខភាពនេះផ្តោតលើការចែករំលែកអំពីសុខភាពបេះដូង ជំងឺដាច់សសៃឈាមខួរក្បាល ការបង្ការ និងទម្លាប់រស់នៅល្អៗដើម្បីឱ្យអតិថិជនយល់ដឹងពីវិធីសាស្រ្តថែទាំសុខភាពសម្រាប់ខ្លួនឯង និងក្រុមគ្រួសារជាទីស្រឡាញ់។

បន្ទាប់ពីបានរៀបចំវេទិកាសុខភាពដ៏ជោគជ័យនៅទីក្រុងភ្នំពេញកាលពីខែមិថុនាកន្លងទៅ ក្រុមហ៊ុនក៏បាននាំយកកម្មវិធីដ៏ពិសេសនេះទៅកាន់អតិថិជននៅឯខេត្តសៀមរាប។

ការរៀបចំវេទិកាសុខភាពនេះឆ្លុះបញ្ចាំងអំពីការប្តេជ្ញាចិត្តរបស់ ដាយ អុិឈិ ឡាយហ្វ៍ ក្នុងការលើកកម្ពសើសុខភាព និងសុខុមាលភាពរបស់សហគមន៍ ជាពិសេសគឺផ្សាភ្ជាប់ជាមួយនឹងការសម្ពោធផលិតផលធានារ៉ាប់រងសុខភាពថ្មី និងដំបូងបង្អស់របស់ក្រុមហ៊ុនដែលមានឈ្មោះថា គម្រោង «SMARTCare Medical»។ ជាមួយនឹងគម្រោងធានារ៉ាប់រងសុខភាពថ្មីនេះ ក្រុមហ៊ុនផ្តល់ជូនទាំងការការពារហិរញ្ញវត្ថុ និងការបង្កើនការទទួលបានចំណេះដឹងផ្នែកសុខភាព ដើម្បីឆ្លើយតបទៅនឹងតម្រូវរបស់អតិថិជននាពេលបច្ចុប្បន្ន ព្រោះសុខភាព និងសុខុមាលភាពជាផ្នែកមួយសំខាន់នៅក្នុងជីវិតរស់នៅប្រចាំថ្ងៃ។

ដាយ អុិឈិ ឡាយហ្វ៍ ក៏បានដាក់សម្ពោធជាផ្លូវការនូវកម្មវិធីផ្តល់អត្ថប្រយោជន៍បន្ថែមដែលហៅថា «Omotenashi VIP» ជាកម្មវិធីពិសេសផ្តល់ការបញ្ចុះតម្លៃលើសេវាកម្មជាច្រើនសម្រាប់អតិថិជនរបស់ ដាយ អុិឈិ ឡាយហ្វ៍។

លោក Mah Kin Yoong អគ្គនាយកប្រតិបត្តិរបស់ក្រុមហ៊ុន ដាយ អុិឈិ ឡាយហ្វ៍ បានមានប្រសាសន៍ថា «យើងជឿជាក់ថា ការយកចិត្តទុកដាក់ចំពោះអតិថិជន គឺមិនមែនតែលើការការពារហិរញ្ញវត្ថុប៉ុណ្ណោះទេ។ ពោលគឺយល់ពីតម្រូវការរបស់អតិថិជន និងគាំទ្រដល់សុខុមាលភាពទូទៅរបស់ពួកគាត់ តាមរយៈគំនិតផ្តួចផ្តើមផ្សេងៗពាក់ព័ន្ធនឹងសុខភាព ការផ្តល់ដំណោះស្រាយធានារ៉ាប់រងសុខភាពដូចជាគម្រោង SMARTCare Medical និងការផ្តល់អត្ថប្រយោជន៍ពិសេសដូចជា Omotenashi VIP។ កិច្ចប្រឹងប្រែងទាំងនេះឆ្លុះបញ្ចាំងពីការប្តេជ្ញាចិត្តរបស់យើងក្នុងការគាំទ្រអតិថិជន ដើម្បីឱ្យពួកគាត់រស់នៅកាន់តែមានសុខុមាលភាពល្អ និងជីវិតកាន់តែមានន័យ។»

គំនិតផ្តួចផ្តើមទាំងនេះក៏ឆ្លុះបញ្ចាំងអំពីគោលបំណងរបស់ ដាយ អុិឈិ ឡាយហ្វ៍ គ្រុប គឺការផ្តល់ជូនអតិថិជនលើសពីការការពារហិរញ្ញវត្ថុ។ ពោលគឺការដែលក្រុមហ៊ុន មិនត្រឹមតែជួយអតិថិជនឱ្យត្រៀមខ្លួនរួចជាស្រេចសម្រាប់ភាពមិនប្រាកដប្រជានៅក្នុងជីវិតប៉ុណ្ណោះទេ ប៉ុន្តែថែមទាំងជ្រោមជ្រែងដល់សុខុមាលភាពអតិថិជនថែមទៀតផង។